E Kiosk chönnt y sy, doch nië-n-e Bank!
Vrchoufe dir mys Härz, verlehne's nid,
wott's nümme zrugg, wenn's aut isch, bruucht und müed,
vrschmiirt, vrchratzet i gar mängem Rank.

Mys Härz isch feÿl, du chasch es günschtyg ha!
Doch zrugggäh zöut nid! Nimm's und luëg em guët!
Egau, wi's zuckt, egau, wi wüud as's tuët!
Und wenn's nid wottsch, vrgiss es, denn hesch gha!

Wüu i mym Kiosk git's no mängerleÿ
rächt schöny Sache z'finde! Träg se heÿ
und fröy dy dra, doch bring mr nüt meh zrugg!

I schänke dir dië Schwetty, lah nid lugg,
bis aues vo mr hesch und ig eleÿ
im Kiosk schtah. Druf näh mr no e Schluck!